您的位置:首页 >> 太阳报 >> 科隆换帅同莱比锡驳火

科隆换帅同莱比锡驳火

来源:网络  时间:2019年11月23日  编辑:8A体育
周末德甲压轴戏,联赛榜二哥RB莱比锡主场迎战尾二嘅科隆,莱比锡近期入波停不了,不过科隆啱啱换帅,新帅基斯度领军下可望激发球员战意同进攻欲望,今晚即使作客都有决心同莱比锡驳火,黑柴推介中位数3.5球大盘。

(Now 670、FOX+、有线651及611台周日凌晨1时30分直播)

RB莱比锡上月曾经历低潮,但近期终于返晒嚟,3线作战近4场正式比赛全胜共轰入20球,认真夸张,前线迪姆华拿喺呢4场波合共交出7个入球同6次助攻,奥地利翼锋沙比萨亦连续4场都有波火,前线火力全开,为追赶榜首慕逊加柏,今晚主场必然继续丧攻,不过佢哋防线超残阵,除伊巴希马天拿迪同队长韦利柯宾一对中坚养伤外,今季表现突出嘅洛迪梅基尼上轮亦重创要养伤数周,加上德国国脚侯斯顿保上阵成疑,随时会因攻得太急而有失。

基斯度可激活莫迪斯迪
科隆上轮踢到补时8分钟至畀贺芬咸绝杀,计表现其实都有啲进步,但无法帮教练拜亚罗沙保住帅印,会方赛后将佢解僱,搵嚟赋閒在家嘅基斯度接手,呢位仁兄向来擅长激励士气,而且踢法亦主动开放,现时科隆阵中不乏具级数攻击手,包括泰路迪、祖安哥度巴同莫迪斯迪,当中莫迪斯迪更係基斯度喺2013年执教贺芬咸时,由法甲波尔多买入嘅第1位新兵,莫迪斯迪喺2016至17年度球季,曾以25个入球成为德甲射手榜第3名,如今两人重聚,睇吓基斯度能否激活番佢嘅射门触觉啦!